بخصوص توزيع المطويات في معرض الكتاب

Posted: يناير 30, 2014 in معرض القاهرة الدولي للكتاب

بسم الله الرحمن الرحيم

بخُصُوص توزيع المطويات في معرض الكتاب

tawzee3

في البداية حابب أشكر كلّ الإخوة الأفاضل والأخوات الفُضليات إللي بيساهموا معانا في توزيع المطويات في معرض القاهرة الدَّولي للكتاب

حابب أنبِّه على بعض النِّقاط السَّريعة عشان خاطر نمنع أي تدخُّل للأمن أو أي احتكاكات بيننا وبين المسيحيين قدر المُستطاع

أولاً

يُفضَّل إن أيّ حد بيوزَّع المطوية يكون مُقتنع بمُحتواها أصلاً!

وممكن تقروا المطويتين من الرابطين دول:

مطوية: عقيدة المُسلمين في المسيح عليه السلام

https://alta3b.wordpress.com/2014/01/15/dogma-christ

مطوية: رسالة الإسلام

https://alta3b.wordpress.com/2013/12/28/resala-islam

ثانياً

لو أيّ حد سألك انت بتوزَّع المطوية ديه على أساس أيه؟!

تقول له: المطوية ديه “دعاية Propaganda” لكُتُب أحنا منزِّلنها المعرض السَّنة ديه

والمطوية تُعتبر “مُلخَّص” أو “مُختصر” لفصول مُعيَّنة في الكُتُب!

الكُتُب ديه طبعاً هي:

المجهول في حياة البتول– لـ معاذ عليان ومحمود عليان

من كتب التَّوراة– لـ معاذ عليان ومحمود عليان

البيان شبهات وردود– لـ معاذ عليان ومحمود عليان ومحمد شاهين

ثالثاً

لو حدّ سألك: طيب انت بتوزَّع هنا ليه؟ متروح تقف قصاد مكتبتك؟!

تقول له: أحنا ناشرين الكُتُب في أكثر من مكتبة

دار مداد– في صالة 2

دار الغد الجديد– في صالة 4

دار التَّقوى ودار السَّلف– في ألمانيا أ

دار القِمري(مجلَّة البيان)

وأحنا واقفين ما بين الصالات عشان نرشد الناس لأماكن كتبنا!

رابعاً

أي حد يجي يسألك عن المطوية أو ليه بتوزَّع أو بتاع

متفترضش إنه مسيحي حاقد وتنط في كرشه!

استقبله بأدب وبابتسامة, وافهم منه هو بيسأل ليه!

خلُّوا بالكم, الأمن جيه كلمني أكثر من مرَّة ومفيش مُشكلة إطلاقاً في مُحتوى المطوية! إللي يهمُّهم إن الأمن يكون مُستَتِبّ في المعرض, وميكونش في أي خناقات أو احتكاكات أو مشاكل بين المُسلمين والمسيحيين في المعرض!

أحنا – زي ما قولت قبل كده – ميهمناش المسيحي! أهمّ حاجة عندي المُسلم! فمتحتكش خالص بأي مسيحيين, ولو هُمَّا احتكُّوا بيك أو عايزين يحاوروك أو يتكلموا معاك, أحرص على إن ميكونش منظركم مُريب! ميكونش في شكل تجمُّع أو حاجة زي كده! خُد المسيحي على جنب, واجلسوا في أي مكان مع نفسيكم, واتكلموا بهدوء شديد!

لو لاقيت المسيحي عايز يزعَّق وبتاع, سيبه وامشي, وروح وزَّع المطويات في أي مكان آخر! المعرض واسع, ومليان مُسلمين!

ملحوظة تانية: لو أخ مُسلم شاف زميله بيتحاور مع واحد مسيحي؛ متبقاش باراشوت, وتقوم راشق في الحوار! ما دُمت واثق من علم الأخّ, ومقدرته على الحوار ومُجادلة المسيحي سيبه هو يتولَّى الأمر! إللي هيقول: أصلي عايز أتعلِّم, التَّعليم مش في المعرض يا حبيبي! روح اتعلِّم في بيتكم! المعرض للتَّطبيق, متروحش ترشق للأخ وتعمل تجمُّع والأمن يجي يلمُّكم كلُّكم!

============================

ملحوظة هامَّة جداً نبِّهت عليها في المُحاضرات كذا مرَّة

============================

ممنوع منعاً باتَّاً إنَّك توزَّع المطويات أمام المكتبات المسيحية مُباشرة

تقف بعيد عنهم سواء على ناصية الشارع على اليمين أو الشمال

برضه متسمحش لأي حد يستفزك أو يجرجرك لنقاش الصوت فيه يكون عالي وتحصل مُشكلة

أحنا هدفنا توعية المُسلمين في المقام الأول, إللي يهمِّنا هُمَّا المسلمين

برضه ممنوع منعاً باتَّاً إنك تمنع المُسلم من دخول المكتبة!

إنت إللي عليك إنك تنصحه بحكمة وموعظة حسنة, هو عايز يشتري كتب ولا يتنصر هو وعيلته كلَّها هو حرّ, إنَّما أنتَ مُنذرٌ, فقط لا غير!

لو في حد شوفته خارج من المكتبة المسيحية وشاري حاجات, تذهب إليه بكل هدوء و وقار, وتُعطيه هدية, سواء كُتيِّب أو مطوية أو أي شيء, وتُخبره بمُنتهى الأدب, والابتسامة على وجهك, هل حضرتك مُهتم بمُقارنة الأديان؟! المكتبة ديه بتبيع كُتُب فيها حاجات مُخالفة للعقيدة الإسلامية وللقرآن! وتحاول تبين له إن الكتب إللي اشتراها فيها مُحتوى تنصيري, هو رضي بكلامك كان بها! وجزاه وجزاك الله خيراً, لاقيت بأه هيتنشن ويزعَّق ويقولك: هو انت وصي عليا؟! وبتاع, قول له جزاك الله خيراً, وسيبه وامشي! مفيش داعي للمشاكل خالص, ومحدِّش يحمِّل نفسه تكاليف فوق إللي كلِّفها لنا الله عزَّ وجلَّ, أحنا علينا البيان والنَّصيحة والإرشاد!

حاول دائماً تكون صاحب ابتسامة, حتى لو انت مغتاظ من ممارسات النَّصارى في المعرض, لكن أهمّ حاجة تقابل المُسلم العامِّي بابتسامة, ومتحسسوش بتنشنه أو كراهية أو حقد أو ما شابه! لازم تاخد في بالك إن في ناس هتشكرك وتقول لك جزاك الله خيراً على مجهودك وكده, وفي ناس تانية هتستحقرك, ومش هتقدَّر مجهودك, ولا نواياك الحسنة, حسبك أن تكون واثقاً من أنَّك حريص على الحفاظ على إسلام إخوانك, وحريص على عدم وقوعهم في فتنةٍ في دينهم, وهدفك نشر العقيدة الإسلامية الصَّحيحة, وبقاء إخوانك على التَّوحيد, وإبعادهم عن الشِّرك والكُفر! وتحمَّل في سبيل ذلك أيّ صعاب, وسيكون لك الجزاء الأعظم عند الله يوم القيامة!

نسأل الله عزَّ وجلَّ أن يجعل أعمالنا خالصة لوجهه الكريم, اللهم آمين

جزاكم الله خيراً جزيلاً, وشُكراً على حُسن تعاونكم معنا!

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s